पुणे : माझे वय कमी असल्याने वाईन शॉपमध्ये मला दारु मिळणार नाही, तू दारु घेऊन ये असे तरुणाला सांगितले. मात्र, त्याने दारु आणण्यास नकार दिल्याने चार जणांनी तरुणाच्या कारचा पाठलाग करुन त्याला बेदम मारहाण केली. त्यानंतर त्याची कार, मोबाईल, पैसे असा एकूण ५ लाख ३५ हजार रुपयांचा मुद्देमाल जबरदस्तीने चोरून नेला. हा प्रकार रविवारी (दि.२१) सायंकाळी पावणे सहाच्या सुमारास वडगाव शेरी भागातील सोमनाथ नगर येथे घडला. याबाबत मोक्षीत सुनिल वर्मा (वय २९ वर्षे, रा. साकोरे नगर, विमानगर, पुणे) याने चंदननगर पोलीस ठाण्यात फिर्याद दिली आहे. त्यावरुन बाळु मसु साळवे (वय २१ वर्षे, रा. मोझेसवाडी, वडगाव शेरी), अभीजीत जगन्नाथ संपत्ते (वय १८ वर्षे, रा. संजय गांधी सोसायटी, वडगाव शेरी), निखिल सुभाष दरेकर (रा. बिडी कामगार वसाहत, चंदननगर), वैभव बापू चव्हाण (रा. ग्रेवाल सोसायटी, वडगाव शेरी) यांच्यावर भारतीय न्याय संहिता कलम ३०९(६), १२६(२), ३२४(४), ३५२, ३(५) नुसार गुन्हा दाखल केला आहे.
पोलिसांनी दिलेल्या माहितीनुसार, फिर्य़ादी मोक्षीत वर्मा हा सोमनाथ नगर येथील वाईन शॉपमधून दारु घेऊन कारमधून जात होता. त्यावेळी आरोपी बाळु साळवे याने मोक्षीतला म्हणाला, माझे वय लहान आहे, एटीएम कार्ड घेऊन जाऊन वाईन शॉपमधून दारू आणून दे असे सांगितले. मात्र, मोक्षीत याने दारु आणून देण्यास नकार दिला. त्यामुळे अभिजीत आणि निखील यांनी फिर्य़ादी यांना शिवीगाळ करुन मारहाण केली. मोक्षीत तिथून कारमधून निघून जात असताना आरोपींनी त्यांच्या दुचाकीवरुन कारचा पाठलाग केला. एका स्वीट मार्टसमोर मोक्षीत याच्या कारवर दगड मारुन काच फोडली. तसेच कारसमोर दुचाकी आडवी लावून कार अडवली. आरोपींनी मोक्षीत याच्या डोळ्यावर दगड मारुन जखमी केले. तसेच कारमधून बाहेर काढून लाथाबुक्क्यांनी मारहाण केली. त्यानंतर आरोपी वैभव चव्हाण याने फिर्यादी यांची कार, मोबाईल व पैसे असा एकूण ५ लाख ३५ हजार रुपयांचा मुद्देमाल चोरुन नेला. पुढील तपास पोलीस करीत आहेत.
मुख्य संपादक : नितीन मधुकर वायदंडे
