u
पुणे : चेन्नईतील एका छायाचित्रकार तरुणाची ‘प्री वेडिंग शूट’च्या आमिषाने फसवणूक करण्यात आल्याचा प्रकार समोर आला आहे. छायाचित्रकाराला पुण्यात बोलावून पुणे आणि गोव्यात छायाचित्र काढण्याचे आमिष दाखवले. तो पुण्यात आल्यानंतर पुणे स्टेशन परिसरातील एका लाॅजमधून तीन कॅमेरे, लेन्स, तसेच अन्य साहित्य असा १२ लाख ८५ हजार रुपयांचा मुद्देमाल चोरुन चोरटे पसार झाले. याबाबत छायाचित्रकार राघवेंद्र एम. गोकुळ (वय २९. रा. शांतीनगर, व्यासरपाडी, चेन्नई, तामिळनाडू) यांनी बंडगार्डन पोलीस ठाण्यात फिर्याद दिली आहे. याप्रकरणी दोन चोरट्यांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, शनिवारी (१८ जानेवारी) रोजी चोरट्यांनी राघवेंद्र यांच्या भावाच्या मोबाइल क्रमांकावर संपर्क साधला. पुणे आणि गोव्यात ‘प्री वेडिंग शूट’ करायचे असून निवास आणि प्रवास खर्चाची व्यवस्था आमच्याकडूनच करण्यात येईल. या कामाचे तीन लाख रुपये मिळतील, असे आमिष त्यांना दाखविले. त्यानंतर चोरट्यांनी त्यांना ऑनलाइन पद्धतीने सुरुवातीला १९ हजार रुपये त्यांना पाठविले. बुधवारी ( २२ जानेवारी) राघवेंद्र आणि त्यांचा भाऊ गोविंदाराजू मध्यरात्री चेन्नईहून विमानाने पुण्याकडे निघाले आणि पाहटे पुण्यात पोहचले. त्यानंतर पुणे स्टेशन परिसरातील एका लाॅजमध्ये राहण्याची व्यवस्था केली असल्याचे त्यांना चोरट्यांनी सांगितले. दुसऱ्या दिवशी सकाळी आठच्या सुमारास त्यांना फोन करुन कोंढवा येथील व्यक्तीचे काम आहे. त्याला भेटण्यासाठी कोरिएंथन क्लबजवळ जायचे आहे, असे चोरट्यांनी त्यांना सांगितले. त्यानुसार राघवेंद्र आणि त्यांचा भाऊ मोटारीतून तेथे गेले. तेव्हा चोरट्याचा मोबाइल क्रमांक बंद असल्याचे लक्षात आले. तासभर तेथे थांबल्यानंतर दोघे जण पुन्हा पुणे स्टेशन परिसरातील लाॅजवर आले. तेव्हा लाॅजमधील खोलीतून तीन कॅमेरे, लेन्स, अन्य साहित्य चोरीला गेल्याचे लक्षात आले. राघवेंद्र यांनी या घटनेची माहिती लाॅज व्यवस्थापाकाला दिली. लाॅजमधील सीसीटीव्ही चित्रीकरण तपासण्यात आले. तेव्हा एक जण लाॅजमधील खोलीतून कॅमेरे आणि अन्य साहित्य घेऊन निघाल्याचे आढळून आले. लाॅजमधील खोली आरक्षित करण्यासाठी दिलेल्या आधारकार्डची तपासणी करण्यात आली. तेव्हा आधारकार्डवरील चोरट्यांचा पत्ता तेलंगणातील निजमाबाद आणि नागपूरमधील असल्याचे आढळून आले. राघवेंद्र यांनी या घटनेची माहिती पोलिसांना दिली. पुढील तपास पोलीस उपनिरीक्षक गणेश चव्हाण करत आहेत.
